Аз 1 апрели соли 2025 дар Тоҷикистон қимати нерӯи барқ барои аҳолӣ ва дигар истеъмолкунандагон боло меравад.
Тибқи қарори Ҳукумати Ҷумҳурии Тоҷикистон аз 11-уми марти соли ҷорӣ, таҳти №165, ки дар рӯзномаи «Ҷумҳурият» нашр шудааст, нархномаҳои нав чунин хоҳанд буд:
– барои аҳолӣ: 1 кВт/соат ба ҷои 30,75 дирами қаблӣ 35,36 дирам;
– барои истеъмолкунандагони бахши давлатӣ, муассисаҳои коммуналӣ ва маҷмааҳои варзишӣ: ба ҷои 26,51 дирам 35,36 дирам;
-барои стансияҳои насосии оби ошомиданӣ ва стансияњои обкашӣ: аз 1 апрел то 30 сентябр ба ҷои 9,2 дирам 12,27 дирам ва аз 1 октябр то 31 март ба ҷои 26,51 дирам 35,36 дирам;
— барои обанборҳои мелиоративй ва стансияҳои насосй: ба ҷои 9,2 дирам 12,27 дирам;
– барои стансияҳои обкашӣ (ба истиснои насосҳои инфиродӣ) ва канализатсия: ба ҷои 12,6 дирам 16,81 дирам; – барои Комбинати металлургии Тоҷикистон: аз 1 май то 30 сентябр ба ҷои 10,64 дирам 14,19 дирам ва аз 1 октябр то 30 апрел ба ҷои 60,65 дирам 80,90 дирам;
– барои муассисаҳои ғайрибуҷетии соҳаи маориф: ба ҷои 45,51 дирам 60,70 дирам; –
барои Корхонаи алюминии тоҷик (ТАЛКО): ба ҷои 15,57 дирам 20,77 дирам;
– барои Ҷамъияти саҳомии «Азот»: 35,36 дирам;
– барои корхонаҳои нассоҷӣ: 40,45 дирам.
Қаблан Хадамоти зиддиинҳисории Тоҷикистон ва ширкати “Барқи тоҷик” аз болоравии нархномаи нерӯи барқ дар соли 2025 хабар дода буданд. Маҳмадумар Асозода, раиси ширкати “Барқи тоҷик”, ирсоли ин пешниҳод ба ҳукуматро низ, таъкид карда буд. Нархномаҳои нерӯи барқ дар Тоҷикистон аз ҷониби Ҳукумати кишвар тибқи қонун тасдиқ карда мешавад. Бори охир тарифҳо аз 1 январи соли 2024 16% боло рафта буданд. Аз ҷумла, барои аҳолӣ нархи 1 кВт/соат нерӯи барқ аз 26,51 то 30,75 дирам боло бурда шуда буд. То соли 2016 қимати нерӯи барқ дар Тоҷикистон танҳо дар солҳои ҷуфт боло рафта, баъдан ҳамасола боло рафтан гирифт.
Бо вуҷуди ин, дар солҳои 2020-2021 ҳукумат тасмим гирифт, ки аз болоравии тарифҳо бинобар вазъи иқтисодии пандемияи COVID-19 худдорӣ кунад. Болоравии тарифҳои нерӯи барқ дар пасманзари камбудии нерӯи барқ дар кишвар сурат мегирад, ки яке аз мушкилоти доғи Тоҷикистон аст. Ҳамасола бо сард шудани ҳаво дар бархе аз манотиқи кишвар маҳдудияти интиқоли нерӯи барқ ҷорӣ мешавад, аммо сокинон аз он шикоят мекунанд, ки дар соатҳои муқарраршуда нерӯи барқ камтар мегиранд.
Сарчашма: Asia-Plus